வலைச்சித்தர் - திண்டுக்கல் தனபாலனுக்கு நன்றி!

நானும் ஒரு வலைப்பதிவர் என்ற முறையில், செப்டம்பர் – 2011 இலிருந்து எழுதி வருகிறேன். ப்ளாக்கர் சம்பந்தப்பட்ட தொழில் நுட்ப தகவல்களை, கூகிள் மூலமாகவே தெரிந்து கொண்டு, எனது வலைத் தளத்தினை அவ்வப்போது மேம்படுத்திக் கொள்வது வழக்கம். இருந்த போதிலும் எனது வலைத்தளத்தில் ஒவ்வொரு கருத்துரைக்கும் கீழே உடனுக்குடன் மறுமொழி எழுதும் Reply settings இல்லை. (இப்போது புதிதாகத் தொடங்கப்படும் வலைப்பதிவுகளுக்கு BLOGGER இல் இந்த வசதி தானாகவே வந்து விடுகிறது). எனவே  கருத்துரைகளுக்கு மறுமொழி தரும்போது , ஒவ்வொரு முறையும் சில கருத்துரைகளை எடுத்து எழுதும்போது சற்று சிரமமாக இருந்தது. 

கூகிளிலும் சில தொழில்நுட்ப பதிவுகளிலும் Settings சென்று HTML CODE ஐ மாற்றி அமைப்பதன் மூலம் இந்த வசதியைப் பெறலாம் என்று சொன்னார்கள். நான் முதன்முதல் புதிதாகத் தொடங்கிய வலைத்தளத்தினில், இது போல் தமிழ்மணம் வாக்கு பட்டைக்காக மாற்றியதில் அந்த தளமே காணாமல் போய் விட்டது. எனவே தெனாலிராமன் பாலைக் கண்டால் ஓடுவது போல, இந்த HTML CODE ஐ மாற்றி அமைப்பது என்றால் பயம்தான். புதுக்கோட்டையில் நடைபெற்ற வலைப்பதிவர்களுக்கான பயிற்சிப் பட்டறையின் போதும் மாற்றிக் கொள்ள நேரம் இல்லாமல் போய்விட்டது. சில வலைப்பதிவு நண்பர்கள் திண்டுக்கல் தனபாலனிடம் விவரம் சொன்னால் மாற்றிக் கொடுத்து விடுவார் என்று சொன்னார்கள். 

(படம் மேலே) புதுக்கோட்டையில் நடைபெற்ற வலைப்பதிவு பயிற்சி வகுப்பில் (மே,2014) மூங்கில் காற்று டி.என்.முரளிதரன் மற்றும் திண்டுக்கல் தனபாலன் இருவரும் பயிற்சி தந்தபோது எடுத்த படம்

நான் யாரோடு (பேச வேண்டும் என்று நினைத்துக் கொண்டு இருந்தேனோ அவரே (திண்டுக்கல் தனபாலன்), புதுக்கோட்டையில் நடைபெற இருக்கும் வலைப்பதிவர் மாநாடு சம்பந்தமாக, நேற்று முன்தினம் செல்போனில் என்னிடம் பேசினார். பேச்சின் இடையே எனது வலைத்தளத்திற்கு தேவையான  Reply settings பற்றிய எனது ஆர்வத்தினையும் சொன்னேன். ”அதற்கென்ன, உடனே செய்து விடலாம் ” என்று சொல்லி, சில விவரங்களை அவருக்கு குறுஞ்செய்தியாக (SMS ) அனுப்பி வைக்கச்சொன்னார். நானும் அவர் சொன்னபடியே செய்தேன். அவர் அங்கு (திண்டுக்கல்லில்) இருந்தபடியே சில நிமிடங்களில் எனது வலைத்தளதில் மாற்றம் செய்து தந்தார். இப்போது நேற்று முன்தினம்  (10.07.15) முதல் எனது வலைத்தளத்திலும்  Reply settings வந்து விட்டது. வலைச்சித்தர் - திண்டுக்கல் தனபாலன் அவர்களுக்கு நன்றி! 

 

( எழுத்துச் சித்தர் பாலகுமாரன்;  வார்த்தைச் சித்தர் வலம்புரி ஜான் – என்பது போல வலையுலகில் வலைச்சித்தர் - திண்டுக்கல் தனபாலன் என்று ஒருமுறை ஒரு கருத்துரை எழுதினேன். ) 

                                        xxxxxxxxxxxxxxxxxxxxxxxxxxxxxxxxxxxxxxxxxxxxxxxx