சட்டமன்ற தேர்தல் 2016 – வின்னரும் ரன்னரும்

ஒரு வழியாக சட்டமன்றத் தேர்தல் - 2016 முடிந்தது. பத்திரிகைகள், டீவி சானல்கள் காட்டிய வாணவேடிக்கைகளில், நமது மக்கள் , தங்களுடைய சொந்த கவலைகள், பிரச்சினைகள் எல்லாவற்றையும், கொஞ்சம் மறந்து இருந்தனர். பரபரப்பான கால் பந்தாட்டம் ஒன்று முடிந்ததைப் போன்று இருக்கிறது. அதிலும் ஒவ்வொருவரும் அ.தி.மு.க அல்லது தி.மு.க ஆட்சியை அமைக்கும் என்று மாறி மாறி மக்களை குழப்பிக் கொண்டு இருந்தனர். 

கருத்துக் கணிப்பும் வாழ்த்துக்களும்:

கட்சி வாரியாக - முடிவுகள்
கட்சி	முன்னிலை / வெற்றி (19.35PM)
அதிமுக	134
திமுக	89
தேமுதிக	00
பாமக	00
காங்கிரஸ்	08
இந்திய யூனியன் முஸ்லிம் லீக்	01
புதிய தமிழகம்	00
பாஜக	00
மதிமுக	00
விடுதலைச் சிறுத்தைகள்	00
இந்திய கம்யூ.	00
மார்க்சிஸ்ட் கம்யூ.	00

(நன்றி: தி இந்து தமிழ் - வியாழன், மே 19, 2016)

தமிழ்நாடு சட்டமன்றத் தேர்தல் மே,16, 2016 அன்று (அரவக்குறிச்சி, தஞ்சை நீங்கலாக) 232 தொகுதிகளுக்கும் ஒரேநாளில் நடந்தது. எல்லோரும் தி.மு.க – காங்கிரஸ் கூட்டணிதான் வெற்றி பெறும் என்று கணிப்பு சொல்ல, C-Voter மற்றும் தந்தி டீ.வி இரண்டும் அ.தி.மு.க.தான் மீண்டும் ஆட்சிக்கு வரும் என்று கணித்திருந்தன இப்போது யார் வின்னர், யார் ரன்னர் என்று முடிவுகளும் தெரிந்து விட்டன. இந்த தேர்தலில் அ.தி.மு.க வின் வெற்றி என்பது எதிர்பார்த்த ஒன்றுதான்.

தொடர்புடைய எனது அரசியல் பதிவு: மீண்டும் ஆட்சியில் ‘அம்மா’தான் http://tthamizhelango.blogspot.com/2016/02/blog-post_20.html

 

வெற்றி பெற்றவருக்கு வாழ்த்து சொல்லுதல் மரபு. அந்த வகையில் இந்த தேர்தலில் வெற்றி பெற்ற அ.இ.அ.தி.மு.க வுக்கும், அதன் பொதுச்செயலாளர் ஜெயலலிதா அவர்களுக்கும் வாழ்த்துக்கள். 

தி.மு.க அல்லது அ.தி.மு.க:

அடுத்து இரண்டாவதாக வந்த தி.மு.க வுக்கும், அதன் தலைவர் கலைஞர் மு.கருணாநிதி அவர்களுக்கும் வாழ்த்துக்கள்.

தமிழகத்தைப் பொறுத்தவரை தி.மு.க வா அல்லது அ.தி.மு.க வா என்ற போட்டியில் அ.தி.மு.க வெற்றி பெற்றுள்ளது. தமிழக மக்கள் எங்களுக்கு இந்த இரண்டு கட்சிகளை விட்டால் வேறு போக்கிடம் இல்லை என்று சொல்லி விட்டார்கள்.

ஊடகங்கள் பெரிது படுத்திய, மக்கள் நலக் கூட்டணியின் தோல்விக்கு முக்கிய காரணமே, வை.கோபால்சாமியின் செயல்பாடுகளே என்று சொல்லித் தெரிய வேண்டியதில்லை. தேர்தலின்போது ஈழம் பற்றி மூச்சு பேச்சு இல்லாத வை.கோ அவர்கள், இனி பச்சைத் தலைப்பாகையை கழட்டி விட்டு, கறுப்பு துண்டுடன் மீண்டும் முழங்கச் சென்று விடுவார். 

காம்ரேடுகளும், திருமாவளவனும் மட்டும் கூட்டணி அமைத்து தேர்தலை சந்தித்து இருந்தால், குறிப்பிடத்தக்க இடங்களையாவது பெற்று இருப்பார்கள்.வாசன் அவர்கள் தனது சகாக்களுடன் மீண்டும் காங்கிரஸில் சேருவதுதான் நல்லது. அ.தி.மு.க துணையோடுதான் பி.ஜே.பி இங்கு அரசியலில் காலூன்ற முடியும் என்பது மீண்டும் நிரூபணம் ஆகி விட்டது. டாக்டர் ராமதாசின் பா.ம.கவின் எதிர்காலம் எப்படி என்பதனை காலம்தான் முடிவு செய்யும்.  

ஆளுங்கட்சிக்கு:

எது எப்படியோ மக்கள் மீண்டும் அ.தி.மு.க வை ஆட்சியில் அமர்த்தியுள்ளனர். அவர்கள் மக்கள் நலனில் அக்கறை கொண்டு நல்லது செய்தால் சரி.

நடக்கும் என்பார் நடக்காது
நடக்காதென்பார் நடந்துவிடும்
கிடைக்கும் என்பார் கிடைக்காது
கிடைக்காதென்பார் கிடைத்துவிடும்

-    கவிஞர் கண்ணதாசன் ( படம்: தாயைக் காத்த தனயன் )

          (ALL  PICTURES COURTESY: GOOGLE IMAGES)

கோடை மழையில் ஒரு தேர்தல் (2016)

இன்று (16.05.2016) சட்டமன்ற தேர்தலுக்கு வாக்களிக்கும் நாள். காலை வழக்கம்போல 5 மணிக்கு எழுந்து விட்டேன். வீட்டுக்கு வெளியே எட்டிப் பார்த்தால் நசநசவென்று மழை. நேற்று இரவிலிருந்தே பெய்து கொண்டு இருப்பது தரையில் இருந்த மழை ஈரத்தை வைத்து தெரிந்து கொள்ள முடிந்தது. சரிதான்., இன்று ஓட்டு போட்டாற் போலத்தான் என்று நினைத்துக் கொண்டேன்.

மழையோ மழை:

ஓட்டு போடுவதற்கு முன்னர், வீட்டிற்கு தேவையான பால் போன்ற சில பொருட்கள் வாங்க வேண்டி இருந்ததால், எனது TVS-50 யில் வெளியே சென்றேன். கடைத் தெருவில் மக்கள் நடமாட்டமும், வாகனங்களும் அதிகம் இல்லை. மெயின் ரோட்டில் இருந்த இரண்டு பள்ளிகளில் காலை ஏழரை மணிக்கெல்லாம் வாக்களிக்க குடை பிடித்தபடி நடந்தும், ஆட்டோவில் வந்தவர்களையும் காண முடிந்தது. கடை வீதியில், பல கடைகள், ஹோட்டல்கள் மூடியே கிடந்தன. நாங்கள் இருக்கும் புறநகர் பகுதியில், நாளை கடை கிடையாது, கிடையாது என்று சொல்லியே நேற்று நிறையபேர் கல்லா கட்டினார்கள். இன்று காலை ஒரு சின்ன டிபன் செண்டர் மட்டும் திறந்திருந்தது. அங்கு நல்ல கும்பல். இட்லி, வடை, பொங்கல் என்று வியாபாரம் அமர்க்களப் பட்டு கிடந்தது. நான் எங்களுக்குத் தேவையான டிபன் வாங்கிக் கொண்டு வழியில் ஆவின் பூத்தில் பால் வாங்கிக் கொண்டு திரும்பினேன். (முன்பெல்லாம் தேர்தல் என்றால் ஓட்டல்களில் கட்சிக்காரர்களையும், அரசு அதிகாரிகளையும் நிறைய காணலாம். வியாபாரமும் அமோகமாக இருக்கும். இப்போது எல்லாமே போயிற்று. எனவே பலரும் கடைகளைத் திறக்க வில்லை)  மழை தூறல் இருக்க இருக்க அதிகமாகிக் கொண்டே இருந்தது. நனைந்தபடியே வீடு திரும்பினேன்.

நானும் ஓட்டு போட்டேன்:

ஒவ்வொரு முறையும் வீட்டுக்கு வெளியே எட்டிப் பார்க்கும் போதெல்லாம் மழை பெய்து கொண்டுதான் இருந்தது. மழை கொஞ்சம் விட்டதும் எனது மனைவியை எனது மகன் அவருடைய பைக்கில் வாக்குச்சாவடிக்கு அழைத்துச் சென்றார். சீக்கிரமே ஓட்டு போட்டு விட்டு திரும்பி விட்டார்கள். மழையின் காரணமாக வாக்குச்சாவடியில் கும்பல் இல்லையாம். எனவே சீக்கிரம் போகச் சொன்னார்கள். நான் எனது TVS-50 யில் புறப்பட்டுச் சென்றேன். திடீரென்று மழை அதிகரித்ததால் நனைய வேண்டியதாயிற்று.

வாக்குச்சாவடிக்குப் போய்தான் எங்கள் தொகுதியில் எத்தனை வேட்பாளர்கள், சின்னங்கள் என்பதைத் தெரிந்து கொள்ள முடிந்தது. போன தடவை தேர்தல் நாளன்று நல்ல வெயில். க்யூவில் அதிக நேரம் நிற்க வேண்டியதாயிற்று. இந்த தடவை மழை. இத்தனை நாளும் பெய்யாத கோடை மழை இன்று பெய்வதும் நிற்பதுமாக இருந்தது. எனவே வாக்குச் சாவடியில் கும்பல் அதிகம் இல்லை. எனவே போனோமா வந்தோமா என்று ஓட்டு போடும் கடமை சீக்கிரமே முடிந்து விட்டது. 

மதியத்திற்குப் பிறகு மழை இல்லை. வானம் மப்பும் மந்தாரமுமாக இருந்தது. எனவே வாக்குச் சாவடியில் நல்ல கும்பல் என்று சொன்னார்கள். 

வித்தியாசமான தேர்தல்:

முன்பெல்லாம் கட்சி வேறுபாடின்றி, வயதானவர்களை, உடல் ஊனமுற்றவர்களை, முடியாதவர்களை, ஒவ்வொரு கட்சியினரும் காரிலோ, ஆட்டோவிலோ வாக்குச் சாவடிக்கு கூட்டி வருவார்கள். இப்போது தேர்தல் ஆணையத்தின் கட்டுப்பாடுகளால் இந்த வாகன உதவியை கட்சிக்காரர்கள் யாரும் செய்வதில்லை. வசதி உள்ளவர்கள் அவரவர் சொந்த வாகனத்திலோ அல்லது கைக்காசு செலவு செய்தோ வந்து செல்கின்றனர். எல்லோரும் ஓட்டு போட வேண்டும் என்கிறார்கள். ஆனால் வசதி இல்லாத முடியாதவர்கள் பலர் இதனாலேயே ஓட்டு போட வருவதில்லை. எனவே இது மாதிரியான முடியாதவர்கள் ஓட்டுப் போட வசதியாக தேர்தல் ஆணையமே வாகன வசதி செய்து தரவேண்டும். அல்லது இந்த கட்டுப்பாட்டை தளர்த்த வேண்டும்.

வாக்குச் சாவடிக்குள் செல்போன் கொண்டு செல்லக் கூடாது, படம் எடுக்கக் கூடாது என்றெல்லாம் நம்மைப் போன்றவர்களுக்கு நிறைய கட்டுப்பாடுகள். ஆனால் பல முக்கிய பிரமுகர்கள் ஓட்டு போட வரும்போது , வாக்குச் சாவடிக்குள் வீடியோ கேமரா மேன் உட்பட பலரும் வாக்குச்சாவடிக்குள் இருந்ததை டீவி சானல்களில் காண முடிந்தது. 

ஜாதி, மத விஷயங்களுக்கு முக்கியத்துவம் தரும் மாநிலமாக நமது தமிழ்நாடு மாறி வருவது கண்கூடு. இப்பேர்பட்ட நேரத்தில் அரசு ஊழியர்களின் ஒத்துழைப்போடு சத்தமில்லாமல், ஒரு வித்தியாசமான  சட்டமன்ற தேர்தல் – 2016 ஐ நடத்திக் காட்டிய, தமிழ்நாடு தேர்தல் அதிகாரி ராஜேஷ் லக்கானி I.A.S அவர்கள் பாராட்டுதலுக்கு உரியவர். இந்தத் தேர்தலில் கோடிக் கணக்கில் பணப்புழக்கம் என்பது தேர்தல் கமிஷன் கட்டுப்பாட்டில் போலீஸ் இல்லை என்பதைக் காட்டுகிறது. உதாரணத்திற்கு, எட்டு கண்டெய்னர்களில், ஐந்தை விட்டு விட்டு, மூன்றை மட்டும் பிடித்தது மற்றும் அரவாக்குறிச்சி, தஞ்சை தொகுதிகள் தேர்தல் தள்ளி வைப்பு போன்றவற்றை சொல்லலாம்..

நானும் ஓட்டு போட்டேன்

முன்பெல்லாம் தேர்தல் என்றால் ரொம்பவும் ஆர்வமாக இருக்கும்.. கட்சியாவது கிட்சியாவது என்பவர்கள் கூட, தேர்தல் நாள் நெருங்க நெருங்க ஏதாவது ஒரு கட்சியின் பக்கம் ஈர்க்கப்பட்டு விடுவார்கள் ஆனால் இந்த தடவை நடந்த தேர்தலில் எனக்கு ஆர்வமில்லை. யாருக்கு வாக்களிப்பது என்பதிலும் குழப்பம். காரணம் உண்மையாகவே இப்போது எனக்கு எந்த கட்சியிலும் ஈர்ப்பும் ஆர்வமும் இல்லை.

ஒரு கிராமத்திற்கு சென்றபோது:

நேற்று , புதன் கிழமை, தஞ்சை மாவட்டம், கபிஸ்தலம் அருகே உள்ள ஒரு சின்ன கிராமத்தில் பெரிய காரியம். இறந்தவர் நெருங்கிய உறவினர் என்பதால் செல்லும்படி ஆயிற்று. திருச்சியிலிருந்து, தஞ்சாவூர், பாபநாசம் வழியே பஸ்ஸில் கபிஸ்தலம் சென்றேன். வழியில் வழ்க்கம் போல ஊர்களை வேடிக்கை பார்த்துக் கொண்டும் மக்களின் அன்றாட நிகழ்வுகளை பார்த்துக் கொண்டும் சென்றேன். முன்பெல்லாம் தேர்தல் என்றால் ஒரே பரபரப்பாக இருக்கும். ஒவ்வொரு ஊரிலும் கட்சி கொடிகள், தோரணங்கள் , கட்சிப் பாடல்கள் , சவுண்டு சர்வீஸ்கள் அலறல் என்று அமர்க்களப்படும். தேர்தல் ஆணையம் வகுத்த கட்டுப்பாடுகள் காரணமாக இந்த தேர்தலில் அவைகள் இல்லை. பஸ்சில் கூட காரசாரமாக அரசியல் பேசும் ஆட்களையும் காண இயலவில்லை. வெயில் வேறு வறுத்துக் கொண்டு இருந்தது. எல்லா ஊர்களும் ஒரே அமைதியாகவே இருந்தன.. 

செல்ல வேண்டிய கிராமம் சென்று, சம்பிராதயங்களை முடித்துக் கொண்டு பந்தலில் அமர்ந்து இருந்தேன். சிலர் அரசியல் பேசிக் கொண்டு இருந்தார்கள். அப்போது அவர்கள் அவரவர் ஊர்களில் தேர்தலை முன்னிட்டு பணப்பட்டுவாடா முடிந்து விட்டதாகச் சொன்னார்கள். அவரவர் கட்சிக்காரர்களுக்கு மாறாமல் இருப்பதற்காகவும், கோயில் திருவிழா போன்ற காரியங்களுக்காகவும், மற்றும் இப்படி அப்படி என்று ஊசலாடுபவர்களுக்கும் பட்டுவாடா நடந்ததாகச் சொன்னார்கள். ரொம்பவும் கெடுபிடிகள் இருக்கின்றனவே என்று கேட்டதில், அவைகள் எல்லாம் உங்கள் டவுனுக்குத்தான்; எங்கள் கிராமங்களுக்கு இல்லை என்றார்கள். உண்மையிலேயே பணம் பட்டுவாடா நடந்ததா இல்லை எல்லோரையும் போல கேள்விப் பட்டதைச் சொன்னார்களா என்று தெரியவில்லை. ஏனெனில் அங்கிருந்த யாரும் பணம் வாங்கியதாகச் சொல்லவில்லை.ஆக இந்த விஷயத்தில் எல்லா அரசியல்வாதிகளுக்கும், ஊர் மக்களுக்கும் இடையில் கட்சி பாகுபாடின்றி ஒரு புரிதல் (UNDERSTANDING)  இருக்கிறது.

இணையதளத்தில் பார்வை:

ஒரு வாரத்திற்கு முன்பே, எங்கள் பகுதிக்கு என்று நியமனம் செய்யப்பட்ட அரசு ஊழியர்கள் எங்கள் குடும்பத்தில் உள்ளவர்களுக்கான வாக்காளர் அடையாள சீட்டுகளை கொடுத்து விட்டனர். எனது அப்பாவும், அம்மாவும் நகரின் இன்னொரு இடத்தில் இருக்கின்றனர். அவர்களுக்கு அடையாள சீட்டுகளை யாரும் கொடுக்கவில்லை என்று இன்று காலை (24.04.14) போன் செய்தார்கள். நான் உடனே தேர்தல் ஆணையத்தின் இணையதளம் சென்று அவர்கள் இருவரது வாக்காளர் அடையாள அட்டை மற்றும் வாக்குச்சாவடி விவரங்களை குறித்துக் கொண்டுபோய் கொடுத்தேன். அப்படியே எங்கள் விவரத்தினையும் சரி பார்த்துக் கொண்டேன்.

நானும் ஓட்டு போட்டேன்:

இன்று (24.04.2014) வியாழக்கிழமை, நானும் எனது மனைவியும் மகனும், நாங்கள் இருக்கும் புறநகர்ப் பகுதியில் ஓட்டு போட ஒரு நடுநிலைப் பள்ளிக்கு சென்றோம். அந்த பள்ளியில் ஐந்து வாக்கு சாவடிகள்.. நிழலுக்கு சாமியான பந்தல்கள் போட்டு இருந்தனர்.

நாங்கள் சென்ற நேரம் எங்கள் வாக்கு சாவடியில் மட்டும் நிறையபேர் இருந்தனர் எங்கள் ஏரியாவில் தொண்டு நிறுவனங்கள் நடத்தும் சேவை ஆசிரமங்கள் நிறைய உண்டு. ஒரு தொண்டு நிறுவனத்திலிருந்து பார்வை இழந்தவர்களை ஓட்டு போட அழைத்து வந்து உட்கார வைத்து இருந்தார்கள். நூற்று ஐம்பது பேருக்கும் அதிகமானவர்கள் இருப்பார்கள். பார்வையற்ற அவர்கள் ஓட்டு போட உதவியாக சில இளைஞர்கள். அவர்கள் அந்த தொண்டு நிறுவன தலைவர் யாருக்கு வாக்களிக்கச் சொல்லி இருந்தாரோ அந்த கட்சிக்கு , பார்வையற்றோர் சார்பாக ஓட்டு போடும் இயந்திரத்தில் உள்ள பட்டனை அமுக்கியதாக தகவல். சிந்தாமல் சிதறாமல் அவ்வளவு ஓட்டும் ஒரு கட்சிக்கு போடப்பட்டது. இதேபோல் ஒவ்வொரு தொண்டு நிறுவனத்திலும் உள்ள பார்வையற்றோர் வாக்குகள் இவ்வாறுதான் போடப் படுகின்றன. இருந்தாலும் அந்த தொண்டு நிறுவனங்கள், அந்த பார்வையற்றோர்களை வைத்து காப்பாற்றும், அந்த நல்ல எண்ணத்திற்காகவும் அவர்கள் மீது உள்ள பரிவு எண்ணம் காரணமாகவும், இதனை பெரிதுபடுத்த வேண்டியதில்லை என்றுதான் நினைக்கிறேன். இதனை எழுதியதும் ஒரு தகவலுக்காகத்தான்.

முதலில் அவர்களில் நான்கு பேரையும், பின்னர் வரிசையில் உள்ளவர்களில் நான்கு பேரையும் வரிசையாக அனுப்பிக் கொண்டு இருந்தார்கள். திடீரென்று அவர்கள் அனைவரும் ஓட்டு போட்ட பின்னர்தான் மற்றவர்களை அனுமதிக்க முடியும் என்றார்கள். மேலும் பார்வையற்றோர்கள் சிலரிடம் சரியான ஆவணங்கள் இல்லை. தொண்டு நிறுவனத்தில் மாற்றி கொடுத்து இருந்தனர்.  ஒரு மணி நேரத்திற்கும் மேலாக வரிசையில் வந்தவர்கள் காத்து இருக்கும் நிலை ஏற்பட்டது. இதனால் கூச்சல் குழப்பம் ஏற்பட்டது. பிரச்சினை அதிகமாகவே அவர்களை சரியான ஆவணங்களோடு வரச் சொல்லிவிட்டு வரிசையில் வந்தவர்களை அனுமதித்தார்கள். ஒரு வழியாக நானும் எனது குடும்பத்தினரும் வாக்களித்து விட்டு வந்தோம். 

தமிழ்நாடு மாநிலத் தேர்தல் ஆணையர் பிரவீண் குமார், எடுத்த சில கடுமையான நடவடிக்கைகள் காரணமாக , இந்த தேர்தலில் ஜாதிக் கலவரம் போன்ற வன்முறை சம்பவங்கள் நடைபெறவில்லை என்பது பாராட்டப்பட வேண்டிய ஒன்று.

இந்தியாவின் முதல் பொதுத் தேர்தல் (1951 – 1952)

இந்தியா சுதந்திரம் அடைந்த பிறகு அதன் முதல் பொதுத் தேர்தல் நடந்தபோது நான் பிறக்கவே இல்லை. எனவே அந்த தேர்தல் எவ்வாறு நடந்தது நடந்தது என்று அறிய GOOGLE SEARCH – இல் தேடினேன். அதில் கிடைத்த சில சுவாரஸ்யமான தகவல்களையும் புகைப்படங்களையும் இங்கு தொகுத்து தருகிறேன். அப்போதைய சென்னை மாகாணம் பற்றிய தேர்தல் படங்கள் இல்லை.

இந்தியாவின் முதல் பாராளுமன்றத் தேர்தல் 1951 ஆம் ஆண்டிலேயே நடைபெறுவதாக இருந்தது. ஆனால் நிர்வாகக் காரணங்களினால் தள்ளி வைக்கப்பட்டு 1951 – 1952 என்று பல கட்டங்களாக நடைபெற்றது. எனவே இந்த தேர்தல் இந்திய பொதுத் தேர்தல் -1951 என்றும் இந்திய பொதுத் தேர்தல் -1952 என்றும் இரு தலைப்புகளில் அழைக்கப்படுகிறது.

(படம் மேலே) காங்கிரசுக்கு ஆதரவாக ஓட்டு கேட்டு காரில் வலம் வரும் காங்கிரசார். அப்போது காங்கிரஸின் சின்னமாக இரட்டைக் காளைகள் இருந்தன.

  

(படம் மேலே) கம்யூனிஸ்டு ஆதரவாளர்கள் டோங்கா எனப்படும் குதிரை வண்டியில் ஆதரவு திரட்டுகின்றனர்.

  

(படம் மேலே) ஜனசங்கத்திற்கு ஆதரவாக ஓட்டு கேட்டு காரில் வலம் வரும் அவர்களது ஆதரவாளர்கள்..

(படம் மேலே) கண்பார்வையற்ற தனது தந்தையை ஓட்டு போட உறவினர்களோடு தூக்கி வந்த மகன்.

(படம் மேலே) ஓட்டு போட வரிசையில் நிற்கும் பெண்கள்

  

(படம் மேலே) மரநிழலில் ஓட்டு போட வரிசையில் நிற்கும் ஆண்கள், பெண்கள்

(படம் மேலே) அன்றைய ஓட்டுப் பெட்டிகள்

(படம் மேலே) ஓட்டு போடும் ஒரு பெண்மணி.

தேர்தல் முடிவுகள்: 

இந்த தேர்தலில் இந்திய தேசிய காங்கிரஸ் பெரும்பான்மை பெற்று, ஜவகர்லால் நேரு , இந்தியக் குடியரசின் முதல் பிரதமர் ஆனார்.

அன்றைய கட்சி நிலவரம்:

Party	Abbr.	Votes	%	Seats
Akhil Bharatiya Hindu Mahasabha	ABHM		0.95	4
Ram Rajya Parishad	RRP		1.97	3
Bharatiya Jana Sangh	BJS	3,246,288	3.06	3
Bolshevik Party of India	BPI		0.02	0
Communist Party of India	CPI	3,484,401	3.29	16
Forward Bloc (Marxist)	FB(M)		0.91	1
Forward Bloc (Ruiker)	FB(R)		0.13	0
Indian National Congress	INC	47,665,875	44.99	364
Krishikar Lok Party	KLP		1.41	1
Kisan Mazdoor Praja Party	KMPP	6,156,558	5.79	9
Revolutionary Communist Party of India	RCPI		0.06	0
Revolutionary Socialist Party	RSP		0.44	3
Scheduled Caste Federation	SCF		2.38	2
Socialist Party	SP	11,266,779	10.59	12
All India Republican Party	REP		0.04	0
All India Republican Party	RPP		0.05	0
All India United Kisan Sabha	UKS		0.06	0
All Manipur National Union	AMNU		0.02	0
All People's Party	APP		0.03	0
Chota Nagpur Santhal Parganas Janata Party	CNSPJP		0.22	1
Cochin Party	CP		0.01	0
Common Weal Party	CWP		0.31	3
Ganatantra Parishad	GP		0.91	6
Gandhi Sebak Seva	GSS		0.01	0
Hill Peoples Party	HPP		0.02	0
Historical Research	HR		0.00	0
Hyderabad State Praja Party	HSPP		0.01	0
Jharkhand Party	JKP		0.71	3
Justice Party	JP		0.06	0
Kamgar Kisan Paksha	KKP		0.13	0
Kerala Socialist Party	KSP		0.1	0
Khasi-Jaintia Durbar	KJD		0.03	0
Kisan Janata Sanyukta Party	KJSP		0.01	0
Kisan Mazdoor Mandal	KMM		0.01	0
Kuki National Association	KNA		0.01	0
Lok Sevak Sangh	LSS		0.29	2
Madras State Muslim League Party	MSMLP		0.08	1
National Party of India	NPI		0.00	0
Peasants and Workers Party of India	PWPI		0.94	2
Peoples Democratic Front	PDF		1.29	7
Praja Party	PP		0.02	0
Punjab Depressed Class League	PDCL		0.01	0
Pursharathi Panchayat	PURP		0.01	0
Revolutionary Socialist Party (Uttar Pradesh)	RSP(UP)		0.02	0
Shiromani Akali Dal	SAD		0.99	4
S.K. Paksha	SKP		0.13	0
Saurashtra Khedut Sangh	SKS		0.03	0
Tamil Nadu Toilers Party	TNTP		0.84	4
Tamil Nadu Congress Party	TNCP		0.03	0
Tribal Sangha	TS		0.11	0
Travancore Tamil Nadu Congress Party	TTNC		0.11	1
Uttar Pradesh Praja Party	UPP		0.2	0
Zamindar Party	ZP		0.27	0
Independents		16,817,910	15.9	37
Nominated Anglo-Indians		-	-	2
Total		105,944,495	100	489

நன்றி: WIKIPEDIA

இந்திய தேர்தல் ஆணையம்:

இந்திய தேர்தல் ஆணையம் ( ELECTION COMMISSION OF INDIA , NEW DELHI) இந்தியாவின் முதல் பொதுத் தேர்தல் பற்றிய புள்ளி விவரங்களை ”STATISTICAL REPORT ON GENERAL ELECTIONS, 1951 TO THE FIRST LOK SABHA “ – என்ற தலைப்பில் சமர்ப்பித்தது. அதில், தேர்தலில் போட்டியிட்ட கட்சிகள், தொகுதிகள் மற்றும் வேட்பாளர்கள் என்று அனைத்து விவரங்களும் உள்ளன.

MY THANKS TO GOOGLE SEARCH  & GOOGLE IMAGES