ஊரன் அடிகள் எழுதிய - புரட்சித்துறவி வள்ளலார்

எனது கல்லூரி மாணவப் பருவத்தின் போது, திருச்சி தெப்பக்குளம் அருகே இருந்த திருநெல்வேலி தென்னிந்திய சைவசித்தாந்த நூற்பதிப்பு கழகத்திற்கு செல்லும் சமயங்களில், அங்கு வரும் தவத்திரு ஊரன் அடிகள் அவர்களைப் பார்த்து இருக்கிறேன். மரியாதை காரணமாக அவரிடம் பேசியது இல்லை. எங்கள் வீட்டு நூலகத்தில், அவர் எழுதிய ‘சாதியும் மதமும்’ என்ற நூல் இருக்கிறது. (2004 ஆம் ஆண்டு வாங்கியது.) அருமையான நூல். நான் படித்த இந்த நூலை, இலக்கியக் கூட்ட நண்பர்களுக்கு பரிசளிக்க வேண்டி, இதன் பிரதிகள் சில வாங்கலாம் என்று மேற்படி கழக புத்தக விற்பனை நிலையத்திற்கு அண்மையில் சென்றேன். அங்கு இந்த நூல் இருப்பு இல்லை. கிளை மேலாளர் திரு.காளத்தீஸ்வரன் அய்யா அவர்கள் (எனது அப்பாவிற்கும் எனக்கும் நல்ல பழக்கம்) அவர் எழுதிய புரட்சித் துறவி வள்ளலார் மற்றும் வள்ளலார் மறைந்தது எப்படி? என்ற இரு நூல்களையும் எடுத்துக் கொடுத்தார். 

தவத்திரு ஊரன் அடிகளார்

திருச்சி சமயபுரம் அருகே உள்ள நரசிங்கமங்கலம் என்ற கிராமத்தில் பிறந்தவர் (22.05.1933) தவத்திரு ஊரன் அடிகளார். ஸ்ரீரங்கம், வேலூர், திருச்சி ஆகிய நகராட்சிகளில் நகர் அமைப்பு ஆய்வாளராகப் பணியாற்றியவர். தமது 22 ஆம் வயதினில் சமரச சன்மார்க்க ஆராய்ச்சி நிலையம் நிறுவியவர்: துறவு வாழ்க்கை மேற் கொண்டவர். வடலூரிலேயே வாழ்ந்து, வடலூர் சன்மார்க்க நிலையங்களில் அறங்காவலராக சிறப்பாகப் பணியாற்றியவர். வள்ளலாரின் வாழ்க்கை வரலாறு மற்றும் சன்மார்க்க சமயம் பற்றி நூல்கள் எழுதியுள்ளார். 

புரட்சித்துறவி வள்ளலார் 

ஊரன் அடிகளார் ‘வள்ளலார் இராமலிங்க அடிகள் வரலாறு’ என்ற ஒரு நூல் எழுதியுள்ளார். அது ஒரு பெரிய நூல். தமிழக அரசின் பரிசு பெற்றது. 

// வள்ளலார் செய்த புரட்சிகளை உலகம் அறிய வேண்டும். அறிந்து கடைப்பிடிக்க வேண்டும். அதற்கெனச் சுருக்கமாக ஆக்கப் பெற்றதே “புரட்சித்துறவி வள்ளலார் “ என்னும் இந்நூல் //

என்று இந்நூலின் முன்னுரையில் ஊரன் அடிகளார் குறிப்பிடுகிறார்.

வள்ளலார் வரலாற்றுக் குறிப்புகள்

இப்பகுதியில் வள்ளலாரின் ` பிறப்பு (05.10.1823), சித்தி (30.01.1874) என்று வரிசையிட்டு சொல்லப்பட்டுள்ளது. அவற்றுள் முக்கியமானது வள்ளலார் கொள்கைகள். (பக்கம் – 10)

1.கடவுள் ஒருவரே.

2.அவரை ஜோதி வடிவிலுண்மை அன்பால் வழிபட வேண்டும்.

3.சிறு தெய்வ வழிபாடு கூடாது.

4.அத் தெய்வங்களின் பேரால் உயிர்ப்பலி கூடாது.

5.புலால் உண்ணலாகாது.

6.சாதி சமய முதலிய வேறுபாடுகள் கூடா.

7.எவ்வுயிரையும் தம் உயிர்போல் எண்ணி ஒழுகும் ஆன்மநேய    ஒருமைப்பாட்டுரிமையைக் கடைப்பிடிக்க வேண்டும்.

8.ஏழைகளின் பசி தவிர்த்தலாகிய ஜீவகாருண்ய ஒழுக்கமே பேரின்ப வீட்டின் திறவுகோல்.

9.புராணங்களும் சாத்திரங்களும் முடிவான உண்மையைத் தெரிவிக்க மாட்டா.

10.மூடப் பழக்க வழக்கங்களை ஒழிக்க வேண்டும்.

11.காதுகுத்துதல் மூக்குக்குத்துதல் வேண்டா.

12.கணவன் இறந்தால் மனைவி தாலி வாங்குதல் வேண்டா.

13.மனைவி இறந்தால் கணவன் மறுமணம் செய்ய வேண்டா.

14.இறந்தவரைப் புதைக்க வேண்டும், எரிக்கக் கூடாது.

15.கருமாதி, திதி முதலிய சடங்குகள் செய்ய வேண்டா.

16.எதிலும் பொது நோக்கம் வேண்டும்

      வள்ளலார் வரலாற்றுச் சுருக்கம்

என்னும் இப்பகுதியில் வள்ளலாரின் பெற்றோர், வள்ளலாரின் பிறப்பு தொடங்கி  சித்திவரை, சென்னை வாழ்க்கை, கந்தகோட்ட வழிபாடு, திருமணமும் இல்லற வாழ்வை நாடாமையும், தண்ணீரில் விளக்கெரித்தது, வடலூரில் சத்திய தருமச்சாலை நிறுவியது, என்று நடந்த நிகழ்வுகள் சுருக்கமாகவும் சுவாரஸ்யத்தோடும் சொல்லப்பட்டுள்ளன. 

நூலில் உள்ள சில செய்திகள் இவை.

// வள்ளலார் எப்பள்ளியிலும் பயின்றதில்லை. எவ்வாசிரியரிடத்தும் படித்ததில்லை. கற்கவேண்டுவனவற்றை இறைவனிடமே கற்றார். கேட்கவேண்டுவனவற்றை இறைவனிடமே கேட்டார். // (இந்நூல் பக்கம் 14)

// முருகப்பெருமானை வழிபடு கடவுளாகவும், திருஞானசம்பந்தரை வழிபடு குருவாகவும், திருவாசகத்தை வழிபடு நூலாகவும் வள்ளலார் இளமையில் கொண்டார் // (இந்நூல் பக்கம் 18)

// இரவில் விளக்கில்லாத இடத்தில் இருக்கக்கூடாதென்பது பெருமான் கொள்கை. ஆதலின் பெருமானது அறையில் இரவு முழுவதும் விளக்கெரிந்து கொண்டேயிருக்கும் // (இந்நூல் பக்கம் 27)

// வள்ளலார் வெள்ளாடைத் துறவி.தூய வெண்ணிற் ஆடையே உடுத்துவார். கல்லாடை உடுத்ததில்லை. துறவுக்கோலத்துக்கு முதல் அறிகுறியாக இன்று கருதப்படுவது காவி உடை. வள்ளலார் காவிதரிக்காது வெள்ளையே உடுத்தினார். கொண்ட கோலத்தாலும் உடுத்திய உடையாலும் ஒரு புரட்சியைச் செய்தார். தத்துவங்களோடு போரிடுவதற்கு அறிகுறி, யுத்தக்குறி – போர்க்கொடி காவி. வெற்றிக்கொடி வெள்ளை. ஆதலில் வெள்ளையே போதும் என்பது வள்ளலார் கொள்கை: அவர் கூறும் விளக்கம் // (இந்நூல் பக்கம் 32)

வள்ளலாரின் பன்முகஞானம் பன்முதன்மை, என்ற தலைப்பினில் அவருடைய பல்வேறு திறமைகள் ( நூல் எழுதுதல், நூலுக்கு உரை எழுதுதல், நூலினைப் பதிப்பித்தல், சித்த மருத்துவம் செய்தல் என்று இன்ன பிற) சொல்லப்பட்டுள்ளன.

பொதுமை நெறி

என்ற பகுதியில், வள்ளலாரின் மேலே சொன்ன கொள்கைகளுக்கு, விளக்கம் தருகிறார் அய்யா ஊரன் அடிகள்.
                                                                                                                                                  

// வாடிய பயிரைக் கண்டபோதெல்லாம் வாடினேன் என்ற பாட்டு வள்ளலாரை அடையாளங் காட்டும் பாட்டு // (இந்நூல் பக்கம் 96)
                                                                                                                                                   

     வாடிய பயிரைக் கண்டபோ தெல்லாம்
          வாடினேன் பசியினால் இளைத்தே
     வீடுதோ ரறிந்தும் பசியறா தயர்ந்த
          வெற்றரைக் கண்டுளம் பதைத்தேன்
     நீடிய பிணியால் வருந்துகின் றோர்என்
          நேர்உறக் கண்டுளந் துடித்தேன்
     ஈடின்மா னிகளாய் ஏழைகளாய்நெஞ்
          சிளைத்தவர் தமைக்கண்டே இளைத்தேன். (3471)

புதுமைத்தலம் வடலூர்

என்ற தலைப்பினுள், வள்ளலார் நிறுவிய, சன்மார்க்க சங்கம் (1865), சத்திய தருமச்சாலை (1867), சத்தியஞானசபை (1872), சித்திவளாகம் (1870 – 1874 ஆகியவை குறித்தும், இந்த நிறுவனங்களின் இன்றைய நிலைமை குறித்தும் சொல்லப்பட்டுள்ளன. சத்திய தருமச்சாலை பற்றிக் குறிப்பிடுகையில், அங்குள்ள ‘அணையா அடுப்பு’ பற்றி குறிப்பிட்டே ஆகவேண்டும். 

// வள்ளற்பெருமான் அன்று ஏற்றிய அணையா அடுப்பு 147 ஆண்டுகளாக இன்றும் அணையாது எரிந்து வருகிறது. நூறாயிரக் கணக்கான ஏழை மக்களின் எரியும் வயிற்றைக் குளிரச் செய்து வருகிறது. பசித்தீயை அவித்து வருகிறது //  (இந்நூல் பக்கம் 123)

சமரசவேதம்

இந்நூலின் இறுதியாக வள்ளலாரின் படைப்புகள் பற்றிய சிறு குறிப்புகளைக் காணலாம். கீழே இந்நூலில் மேற்கோளாகக் காட்டப்பட்டுள்ள திருஅருட்பா பாடல்கள் சில.

     அன்பெனும் பிடியுள் அகப்படும் மலையே
          அன்பெனும் குடில்புகும் அரசே
     அன்பெனும் வலைக்குட் படுபரம் பொருளே
          அன்பெனும் கரத்தமர் அமுதே
     அன்பெனும் கடத்துள் அடங்கிடும் கடலே
          அன்பெனும் உயிரொளிர் அறிவே
     அன்பெனும் அணுவுள் அமைந்தபே ரொளியே
          அன்புரு வாம்பர சிவமே.                             (3269)

     கோடையிலே இளைப்பாற்றிக் கொள்ளும்வகை கிடைத்த
          குளிர்தருவே தருநிழலே நிழல்கனிந்த கனியே
     ஓடையிலே ஊறுகின்ற தீஞ்சுவைத்தண் ணீரே
          உகந்ததண்ணீர் இடைமலர்ந்த சுகந்தமண மலரே
     மேடையிலே வீசுகின்ற மெல்லியபூங் காற்றே
          மென்காற்றில் விளைசுகமே சுகத்தில்உறும் பயனே
     ஆடையிலே எனைமணந்த மணவாளா பொதுவில்
          ஆடுகின்ற அரசேஎன் அலங்கல்அணிந் தருளே.  (4091)

முடிவுரை: 

வடலூர் வள்ளலார் இராமலிங்க அடிகள் பற்றிய சுருக்கமான வரலாறு மற்றும் அவருடைய சமரச சன்மார்க்க நெறிகள் ஆகியவற்றை அறிந்து கொள்ள உதவும் இந்நூல்., எளிமையான நடையில் அமைந்துள்ளது. இந்த நூலினைப் படித்தவுடன் வடலூர் செல்ல வேண்டும் என்ற விருப்பம் எனக்குள் ஏற்பட்டுள்ளது. போய் வரவேண்டும்.

(நூலின் முன்பக்க அட்டை)

(நூலின் பின்பக்க அட்டை)

நூலின் பெயர்: புரட்சிதுறவி வள்ளலார்

ஆசிரியர்: ஊரன் அடிகள்

நூலின் பக்கங்கள்; 168 விலை: ரூ100/= ஐந்தாம் பதிப்பு 17.01.2014

நூல் வெளியீடு: சமரச சன்மார்க்க ஆராய்ச்சி நிலையம், தபால்பெட்டி எண்.2 மனை எண் 64, முருகேசன் சாலை, என்.எல்.சி. ஆபிசர்ஸ் நகர், வடலூர் – 607 303, கடலூர் மாவட்டம் தொலைபேசி 04142 259382 செல் – 9443729881

பெற்ற தாய்தனை மக மறந்தாலும்

எனது சின்ன வயதினில் எனது தந்தை ”பெற்ற தாய்தனை மக மறந்தாலும், பிள்ளையைப் பெறும் தாய் மறந்தாலும்” – எனத் தொடங்கும் வள்ளலாரின்  பாடலை அடிக்கடி பாடக் கேட்டு இருக்கிறேன். அதன்பிறகு வள்ளலாரின் அடியார்கள் நடத்தும்  தைப்பூசத் திருவிழா சமயங்களில் ஒலிபெருக்கியில் கேட்டு இருக்கிறேன்.

ஒருசமயம் திருச்சி சென்ட்ரல் தியேட்டரில் பாதகாணிக்கை படம் பார்த்தேன். அந்த படத்தின் கதையில் மூத்தமகன் (அசோகன்) மாமனார் (எம்.ஆர்.ராதா) பேச்சைக் கேட்டுக் கொண்டு மாமனார் வீட்டில் (எதிர் வீடு) இருப்பான். அங்கிருந்து கொண்டு தனது தந்தை (எஸ் வி சுப்பையா) மீது சொத்தில் பங்கு கேட்டு வழக்கு தொடுத்து கோர்ட்டுக்கு இழுப்பான். கோர்ட்டுக்கு இருவரும் புறப்படுகின்றனர். கோர்ட்டுக்கு கிளம்பும் முன், தந்தை (எஸ் வி சுப்பையா) சாமி கும்பிடுவார்.அப்போது  இந்த பாடலை மனம் உருக பாடுவார். அந்த பாடல் காட்சி இன்றும் எனக்கு மறக்க முடியாத ஒன்றாயிற்று.

வள்ளலார் அந்த பாடலில் சில நுணுக்கமான விஷயங்களை சொல்லி இருக்கிறார். முதலில் தாய்ப்பாசம். எங்காவது பெற்ற தாயை பிள்ளை மறக்குமா? அதேபோல தான் பெற்ற பிள்ளையையே எந்த தாயாவது மறப்பாளா? தாய்ப்பாசம் அத்தகையது. ஆனால் வள்ளலார் இருவருமே மறக்கக் கூடியவர்கள் என்கிறார். இது உண்மையாவதை இப்போது செய்தித் தாள்களில் பார்க்கிறோம். பெற்ற குழந்தையை தாயே வறுமையின் காரணமாக விற்கிறாள்.  அதே போல பெற்ற தாயையே சொத்துக்காக மகனே கொலை செய்கிறான்

அடுத்து உடல் உயிர் இடையே உள்ள நட்பு. இத்தனை நாள் நாம் இருந்த, இந்த உடலை விட்டு பிரிவதா என்று உயிர் நினைப்பதில்லை. அதே போல தன்னை இத்தனை நாள் இயக்கிய உயிர் பிரிகிறதே என்று உடலும் கவலைப் படுவதில்லை.. இந்த கருத்தினை

      குடம்பை தனித்தொழியப் புட்பறந் தற்றே
      யுடம்போ டுயிரிடை நட்பு.. – திருக்குறள் (338)

(உடம்போடு உயிர்க்கு உள்ள உறவு, தான் இருந்த கூடு தனியே இருக்க அதைவிட்டு வேறிடத்திற்குப் பறவை பறந்தாற் போன்றது – டாக்டர் மு.வ உரை )

என்கிறார் திருவள்ளுவர் இதனையும் வள்ளலார் சொல்கிறார்

அடுத்து கலைஞனின் வித்தை. ஒவ்வொரு கலைஞனும் தான் கற்கும் வித்தைகளை மனதாரக் கற்கின்றனர். அவற்றை நெஞ்சினில் ஏற்றி வைக்கிறார்கள்.  சிலசமயம் அந்த நெஞ்சம் மனதாரக் கற்ற அந்த வித்தையையே மறந்துவிடுகிறது. கர்ணனுக்கு தான் கற்ற வித்தை சாபம் காரணமாக சமயத்தில் மறந்து போகும்.

அடுத்து கண்ணும் இமையும். கண்ணன் பாட்டில் பாரதியார் “கண்ணை இமையிரண்டும் காப்பதுபோல் என் குடும்பம் வண்ணமுறக் காக்கின்றான்” என்று சொல்கிறார். கண்களை மூடிமூடி திறக்கும் இமைகள் கூட அந்த தொழிலை சிலசமயம் மறந்துவிடுகிறன. இதனையும் வள்ளலார் குறிப்பிடுகின்றார்.

 இவ்வாறு இயற்கையிலேயே சில விதி விலக்குகள் நடைபெறுகின்றன. இவ்வாறு நடைபெறுவதையெல்லாம் குறிப்பிட்ட வள்ளலார், எது நடந்தாலும் நான் மட்டும் நமச்சிவாயத்தை மறக்கவே மாட்டேன். என்று சொல்கிறார். இதோ அந்த பாடல்

பெற்ற தாய்தனை மகமறந் தாலும்
      பிள்ளை யைப்பெறும் தாய்மறந் தாலும்
உற்ற தேகத்தை உயிர்மறந் தாலும்
      உயிரை மேவிய உடல்மறந் தாலும்
கற்ற நெஞ்சகம் கலைமறந் தாலும்
      கண்கள் நின்றிமைப் பதுமறந் தாலும்
நற்ற வத்தவர் உள்ளிருந் தோங்கும்
      நமச்சி வாயத்தை நான்மற வேனே!

                              -இராமலிங்க அடிகளார்

( திருவருட்பா, இரண்டாம் திருமுறை 23. நமச்சிவாயப் பதிகம் )

 

இதன் பொருள்; (எளிமையாக்கப் பட்டது)

தன்னைப் பெற்ற தாயை அந்த குழந்தையானது மறந்தாலும்,
தான் பெற்ற பிள்ளையை அந்த தாயே மறந்தாலும்,  தான் நின்று இயங்குதற்கு அமைந்த தேகத்தை உயிர் மறந்தாலும்,  

தன்னை இயக்குகின்ற உயிரின் தன்மையை உடல் மறந்தாலும்,   
தன்னை நன்கு கற்று நெஞ்சில் நிலை பெறக்கொள்ளும் கலையுணர்வு அந்த நெஞ்சை மறந்தாலும்,

கண் பார்வைக்குக் காவலாய் அமைந்து மேலும் கீழும் சென்று இமைக்கும் இமைகளைக் கண்கள் மறந்தாலும்,

நல்ல தவத்தவர்களான சான்றோர் திருவுள்ளத்திலிருந்து ஓங்கும் நமச்சிவாயம் என்ற திருப்பெயரை நான் மறக்கமாட்டேன்.