சுட்ட பதிவு வேண்டுமா?

கல்லூரி மாணவனாக இருந்தபோது ஒரு, ஒரு குயர் நோட்டை வைத்துக் கொண்டு பக்கத்திற்கு பக்கம் கவிதைகளையும், அவற்றிற்கு பொருத்தமான கிறுக்கல் ஓவியங்களையும் வரைந்தது ஒரு காலம். கவிதைகளில்  மரபுக் கவிதைகள், புதுக் கவிதைகள் இரண்டும் எனக்கு நன்றாக வரும். ஒருமுறை ஒரு பேராசிரியர் “இளங்கோ! பெரும்பாலும் நாம் எழுதிய கவிதைகளை நாமேதான் படித்துக் கொள்ள வேண்டும். எனவே கட்டுரைகள் எழுதுவதில் கவனம் செலுத்துங்கள் “ என்று சொன்னார். அன்றிலிருந்து கவிதைகளை பக்கம் பக்கமாக எழுதி கிழிப்பதை விட்டு விட்டேன்.  அவர் சொன்னது உண்மை என்பதனை, நூலகங்களில் அலங்காரமாகவே இருக்கும் , பல கவிதை நூல்களைக் கண்டு தெளிந்து கொண்டேன். எனது நண்பர் ஒருவர் நல்ல கவிஞர். தான் எழுதிய கவிதை நூல்களை சரியாக விற்பனை ஆகாததால், அனைத்தையும் அன்பளிப்பாகவே நண்பர்களுக்கு கொடுத்தார். மக்கள் என்றும் விரும்பும் பாரதியார், பாரதிதாசன், பட்டுக்கோட்டை கல்யாண சுந்தரம், கண்ணதாசன், வாலி, வைரமுத்து போன்ற கவிஞர்கள் உருவாக வேண்டும்.

எப்படி இருந்தாலும் கவிதை என்பது நமது ஆன்மாவின் குரல் என்பதை மறுக்க இயலாது. காசுக்காக யாரும் எழுதுவதில்லை. தமது ஆன்ம திருப்திக்காகவே ஒவ்வொருவரும் கவிதை பாடுகின்றனர்.  இப்போதும் நான் அவ்வப்போது  புதுக்கவிதைகளை வலைப்பதிவில் எழுதுவதுண்டு. இங்கே மூன்று புதுக் கவிதைகள். யாரும் சுடாமல் இருந்தால் சரி.

                                       PICTURE THANKS TO : http://bloggerbabes.com

(குறிப்பு: ஒருவர் எழுதிய பதிவை அப்படியே நகலெடுத்து தனது பதிவில் தனது பெயரில் வெளியிட்டால் சுட்ட பதிவு. அதனையே இன்னாருடையது என்று தெரிவித்தால் அது மேற்கோள் பதிவு. இது தவறாகாது)

சுட்ட  பதிவு வேண்டுமா?

சுட்ட  பதிவுவேண்டுமா? – இல்லை

சுடாத  பதிவு வேண்டுமா? என்றே

கேட்ட குமரனிடம் சுட்ட பதிவே

வேண்டினாள்  அவ்வை!

ஏனென்று கேட்ட போது

அவள் பாடல்களையும்

யாரோ சுட்டு விட்டார்களாம்

தேடுவதற்கே  என்றாள்

யாரோ சொல்லி விட்டார்கள்

சுட்ட பதிவுகள் சுட்ட படங்கள்

வலைத்தளத்தில் நிறையவே

கொட்டிக் கிடக்கின்றன என்று.

அந்த  அவ்வைக்கும்

ஒரு ஜிமெயில்

கணக்கு வேண்டுமாம்

யாரும் சுட்டு விடாதீர்கள்

அரசியலில் வேஷமும் கோஷமும்

எந்த விலை ஏறினாலும்

எத்தனை முறை ஏறினாலும்

அத்தனையும் தாங்குவோம்!

எங்க ஊரு எம்எல்ஏவும் எம்பியும்

எங்காளு எங்காளு! எதிர்க்க மாட்டோம்!

புரட்சியாவது! புடலங்காயாவது!

அந்நிய நாடுகளில் நடந்த

ஆவேச புரட்சி இங்கு வராது!

இப்போது நாங்கள் போடுவது கோஷம்!

தேர்தல் வந்தால் போடுவோம் வேஷம்!

என்னவர்கள் ஓட்டு அன்னவருக்கு இல்லை!

அன்னவர்கள் ஓட்டு என்னவருக்கு இல்லை! – ஏன்

உன்னவருக்கும் இல்லை! – இருந்தாலும்

அடுத்து ஆளப் போவது நாங்கள்தான்! - என்ன

கணக்கு என்று மட்டும் கேட்காதீர்கள்!

எங்கே தமிழன்?

தமிழன் தமிழன் என்றே

கதைக்கின்றார் நம்நாட்டில்!

அக்மார்க் தமிழனைத்

தேடித் தேடி அலைந்தேன்!

அங்கிங்கெனாதபடி எங்கெங்கும்

இருக்கின்றார்கள் ஜாதித் தமிழர்கள்!

                                       ( படம் மேலே - நன்றி “நக்கீரன்” வார இதழ்)