புத்தாண்டு பிறந்தது! (2015)

புத்தாண்டு பிறந்தது!  (2015)

புத்தாண்டு பிறந்தது! – ஆங்கிலப்

புத்தாண்டு பிறந்தது!

புத்தாண்டை வரவேற்கும்

காலை வழிபாடு

சர்ச்சுகளில் மட்டுமா – எங்கள்

ஊர் ஆலயங்கள் 

அனைத்திலும் தான்.

இந்த புத்தாண்டு தினத்தில்!

வைகுண்ட நாதருக்கும்

வந்து விட்டது ஆசை

இன்றே வைகுண்ட ஏகாதசி!

வண்ண வண்ண கேக்குகள் – வகை

வகையாய் ஐஸ்கிரீம்கள் – என்றே

வழிந்தோடும் பேககரிகள்.

மட்டன் பிரியாணி

சிக்கன் பிரியாணி

முட்டை பிரியாணி - என்றே

கமகமக்கும் விடுதிகள்

சைக்கிள் பூக்கூடைகளில்

புதிதாய் வந்த செய்தியென

மல்லிகை, முல்லை, செவ்வந்தி,

என்றே அடுக்கி வைக்கப்பட்ட

மலர்ப் பந்துகள் - கிறங்க வைக்கும்.

ஒற்றை ரோஜாவை தேடிய

இளைஞனுக்கும் ஏமாற்றமில்லை! 

வலைப் பதிவர்களின்

வாழ்த்துக்களுக்கும்

பஞ்சமில்லை!

நெஞ்சார வாழ்த்துங்கள்

வாயார சொல்லுங்கள்

அனைவருக்கும் – ஆங்கில

புத்தாண்டு வாழ்த்துக்கள்!

 

                                            ( ALL PICTURES THANKS TO GOOGLE)

வெளிநாடு செல்லும் V.G.K - வாழ்த்துக்கள்!

கடந்த பத்து மாதங்களாக ( 01.01.2014 தொடங்கி 09.11.2014 வரை) தமிழ் வலைத் தளத்தில் “ V.G.K சிறுகதை விமர்சனப் போட்டி “ நடத்திய மூத்த வலைப் பதிவர் அய்யா திரு V.G.K (வை.கோபாலகிருஷ்ணன்) அவர்களைச் சந்தித்து வாழ்த்துக்களை நேரில் தெரிவிக்கலாம் என்று எண்ணி இருந்தேன். (இந்த ஆண்டு துவக்கத்தில் (ஜனவரியில்) தொடங்கிய இந்த போட்டியைப் பற்றி தொடர்ந்து 10 மாதங்களுக்கும் மேலாக, தனது வலைத்தளத்திலும் தமிழ் வலையுலகிலும் அனைவரும் பேசும்படி ஒரு சாதனை செய்து விட்டார் என்பதே உண்மை.) மழையின் காரணமாக அவரை சந்திப்பதற்கு   இன்று செல்லலாம், நாளை செல்லலாம் என்று தள்ளி வைத்துக் கொண்டே இருந்தேன். இதற்கிடையே வரும் 15 ஆம் தேதி (நாளை) தான் குடும்பத்துடன் வெளிநாடு செல்ல இருப்பதாகவும் திரும்பி வர ஒருமாதம் ஆகலாம் எனவும் ” ஒருசில புதிய தகவல்கள்”  என்ற சிறிய தலைப்பில், தனது பதிவினில் தெரிவித்து இருந்தார். (http://gopu1949.blogspot.in/2014/11/vgk-31-to-vgk-40.html )

எனவே இன்று (14.11.2014) எப்படியும் அவரை சந்தித்து விட வேண்டும் என்ற ஆவலில் புறப்பட்டேன். அதற்கு முன்னர் அவரோடு தொடர்பு கொண்டு பேசலாம் என்று செல்போனில் பேசினால் “ நெட் ஒர்க் பிஸி” என்ற தகவலே வந்தது. அவர் குடியிருக்கும் திருச்சி வடக்கு ஆண்டார் வீதி புறப்பட்டுச் சென்றேன். நல்லவேளை மழை இல்லை. அவர் வசிக்கும் அடுக்குமாடி குடியிருப்பை  அடைந்ததும் கீழே இருந்து மறுபடியும் தொடர்பு கொண்டேன். என்னை வரச் சொன்னார். மேலே சென்றேன். உறவினர் வீட்டு நிகழ்ச்சி ஒன்றில் கலந்து கொள்வதற்காக அவர் கிளம்பிக் கொண்டு இருந்தார்.

வீட்டில் V.G.K அவர்களும் அவரது மனைவியும் இரண்டாவது மருமகளும் இருந்தனர். எல்லோரும் என்னை இன்முகத்துடன் வரவேற்றனர். எல்லோருக்கும் வணக்கம் சொல்லிவிட்டு அமர்ந்தேன். வெளிநாடு செல்வதற்கு வேண்டிய ஏற்பாடுகள் முன்னதாகவே நடந்து கொண்டு இருப்பதை, அங்கே ஹாலில் கிடந்த பெரிய பெரிய டிராவல் பேக்குகளை வைத்து தெரிந்து கொண்டேன். V.G.K   அவர்களோடு பேசிய்தில், அவர் தனது மூத்த மகன் இருக்கும் துபாய் நாட்டிற்கு தனது மனைவி மற்றும் மூத்த சம்பந்திகளோடு செல்வதாகச் சொன்னார். மேலும் அங்கு (துபாயில்) பள்ளியில் படித்து வரும் சிறுமியான  அவரது ஒரே பேத்தி (செல்வி. பவித்ரா) சாதனை புரிவதற்காகவே  அவள் படித்துவரும் புகழ்பெற்ற பள்ளியின் சார்பில் தனியாக  U.A.E., to U.S.A.,  ஒருவாரப் பயணம் மேற்கொள்கிறாள் எனவும், அவளை ஆசீர்வதித்து அனுப்பி வைக்கவும் திரும்ப அவளை பெருமையுடன் வரவேற்கவும்  திடீரென்று கிளம்பியதாகவும் சொன்னார். (அவரது பேத்தி பவித்ராவுக்கு வாழ்த்துக்கள்)

தமிழ் வலைத்தளத்தில் அவர் ஆற்றிய சிறந்த பணிகளுக்கும் மற்றும் அவரது அயல்நாட்டு பயணத்திற்கும் வாழ்த்துக்களைத் தெரிவித்துக் கொண்டு , அவருக்கு பரமஹம்ஸ யோகானந்தர் எழுதிய “ஒரு யோகியின் சுயசரிதம்” என்ற நூலினைப் பரிசாக வழங்கினேன். (இந்த நூலை இப்போது நான் படித்துக் கொண்டு இருக்கிறேன் ) பின்னர் அவர்கள் வீட்டில் சூடான சுவையான ஒரு டம்ளர் காபியை அருந்திவிட்டு விடை பெற்றுக் கொண்டேன்.

அப்போது எடுக்கப்பட்ட சில புகைப் படங்கள்:

நாளை வெளிநாடு சுற்றுலாப் பயணம் செல்லும் அய்யா திரு V.G.K (வை.கோபாலகிருஷ்ணன்) அவர்களுக்கும் அவரது குடும்பத்தாருக்கும் எனது உளங்கனிந்த நல் வாழ்த்துக்கள்! அவர்களது  பயணங்கள் இனிதாகவும்  பாதுகாப்பானதாகவும்  மகிழ்ச்சியாகவும் அமைய  இறைவனிடம் பிரார்த்தனை செய்து கொள்கிறேன்!

இணைப்பு (16.11.2014)

அய்யா V.G.K அவர்கள் நலமாக சென்று சேர்ந்ததாக நேற்று மின்னஞ்சல் அனுப்பியுள்ளார். அதன் நகல் கீழே:

Dear All,

Good Evening !

I would like to inform you that We are safely landed at United Arab Emirates today 15.11.2014 at 5.00 PM here which is equal to 6.30 PM - Indian Standard Time.

We are now So Happy with our Grand Children here.

This is just for your information, please.

Thanks for your kind Wishes, Greetings, Prayers etc.,

Yours,
GOPU [VGK]  

சித்திரைப் பெண்ணே!

                

                    சித்திரைப் பெண்ணே!

                    சித்திரைப் பெண்ணே! –

                    பயந்து விடாதே!

                    முத்திரை பெற்ற உன்

                    வசந்தத்தை அள்ளித்தர

                    மறந்து விடாதே!

                    பன்னிரு மாதங்களில்

                    முதன்மையும் நீயே!

                    தொடக்கமும் நீயே!

                    எத்தனையோ மரபுகள்

                    எத்தனையோ பெயர்கள்

                    தெற்கு வடக்காயின!

                    உன்னையும் அப்படித்தான்

                    முடக்கி வைத்தார்கள்!

                    சித்திரைப் பெண்ணே!

                    சித்திரைப் பெண்ணே! –

                    பயந்து விடாதே!

                    புத்தாண்டு வாழ்த்துக்கள்

                    சொல்ல மறந்து விடாதே!

தி இந்து – பொங்கல் மலர் 2014 (ஒரு பார்வை)

பேப்பர் போடும் பையன் “ சார் இந்து பொங்கல் மலர் வேண்டுமா?” என்று கேட்டார். ” ஆமாம் வேண்டும்” என்றேன். தாமதமாகச் சொன்னதால் இந்துவின் முதல் தீபாவளி மலர் (2013) கிடைக்காமல் போனது. எனவே அவரே கேட்டுவிட்டார்.அந்த பையன் சொன்னபடியே இன்று காலை (10.01.2014) தி இந்துவின் பொங்கல் மலரைக் கொடுத்து விட்டார். எப்போதும் போல புதிதாக வாங்கிய புத்தகத்தை புரட்டினேன்.

எனக்குத் தெரிந்து மற்ற பத்திரிககைகள் பொங்கல் மலரை சிறப்பாக வெளியிட்டது கிடையாது. பெரும்பாலும் அவை தீபாவளி மலர் வெளியிடுவதில்தான் அக்கறை காட்டும். மேலும் தீபாவளிக்கும் பொங்கலுக்கும் இடையில் இடைவெளி, கொஞ்ச நாட்கள் என்பதும் ஒரு காரணம்.

வடிவமைப்பு:

இந்த ஆண்டு தி இந்துவின் முதல் பொங்கல் மலரை சிறப்பாகவே வெளியிட்டு இருக்கிறார் இந்து என் ராம் அவர்கள். உலகத் தமிழர்களுக்கு வணக்கம் கூறி ஆசிரியர் கே அசோகன் அவர்கள் வரவேற்கிறார். ஆசிரியர் பக்கத்தில். மலரை வெளியிடுபவர், ஆசிரியர், பொறுப்பாசிரியர், ஆசிரியர் குழு, வடிவமைப்பாளர்கள் பெயர்கள். பொங்கல் மலரின் உள்ளே என்ன இருக்கிறது என்பதனை பொருளடக்கமாக சொல்லியுள்ளனர். இதன் மூலம் பத்திரிகை உலகில் தாங்கள் பழமையானவர்கள் என்பதனை உணர்த்தி இருக்கின்றனர்.

படங்களும், புகைப்படங்களும்:

பத்திரிகைகளில் மலர் என்றாலே, புகைப்படங்கள்தான் பிரதானமாக இருக்கும். பழைய தீபாவளி மலர்களில் கறுப்பு வெள்ளை புகைப்படங்கள் கண்ணைக் கவரும். தெளிவான படங்களுடன் கூடிய செய்திகள் வெளியிடுதல் இந்துவின் சிறப்பம்சங்களில் ஒன்று. இந்த ஆண்டு வந்த இந்துவின் பொங்கல் மலரில் இவற்றைக் காணலாம். காமிராவின் கண் தடங்கள் தலைப்பில் வைட் ஆங்கிள் ரவிஷங்கரின் சென்னையில் ஒரு மார்கழிக் காலை விடியல் படங்கள் நல்ல உதாரணம்.

கட்டுரைகள்:

காட்டுயிர்த் தடங்களில்  ப ஜெகநாதன் அவர்கள் அழகிய புகைப்படங்களுடன் தகவல்கள் தந்துள்ளார். சமூகம் பண்பாடு என்ற பகுதியில் ஜல்லிக்கட்டு, சேவக்கட்டும் பொங்கல் பற்றிய சமூகச் செய்திகளை அழகிய வண்ணப் படங்களுடன் காணலாம். தமிழ் சிறுகதை இலக்கிய கர்த்தாக்களில் ஒருவரான கு.ப.ராஜகோபாலனின் ” வீரம்மாளின் காளை” என்ற சிறுகதையை  பெருமாள் முருகன் என்பவர் விமர்சனம் செய்துள்ளார். இதற்கான அழகிய படங்களைத் தந்தவர் ஏ.எம்.சுதாகர்.

                   வாழும்போது வைக்காதேடா சேத்து

               ஏதும் அனுபவிக்காம போய்விடுவேடா செத்து

என்று பாடுகிறார் மரணகானா விஜீ.

 
சாவு வீடுகளில் பாடப்படும் கானா பாடல்கள் பற்றி நல்ல அலசல் செய்து இருக்கிறார் த. நீதிராஜன். 

சேவக்கட்டு எனப்படும் சண்டைக் கோழிகள் பற்றி ஒரு கட்டுரை (ஏ வி பி தாஸ்)

ஆர்.சி.ஜெயந்தன், ஜல்லிக்கட்டு காளைகள் பற்றியும், இப்போது மாறி வரும் சூழ்நிலையைப் பற்றியும் ஆதங்கத்தோடு வெளிப்படுத்துகிறார்.

ஊர்மணம் பகுதியில் வடுவூரின் கபடி விளையாட்டு, நெல்லை மற்றும் கொங்கு பகுதிகளின் பொங்கல், வடசென்னை வாழ்க்கை என்று பல சுவையான செய்திகள். மலைமக்களின் வாழ்க்கைக்கு உற்ற நண்பர்களாக இருக்கும் அகமலைக் குதிரைகள் பற்றி சுவையான செய்திகள் தருகிறார் ஜெயந்தன் .(படங்கள் பயஸ்)

இலக்கியப் பக்கங்கள

இலக்கியம் என்ற வரிசையில் கவிதைகள், சிறுகதைகள் வருகின்றன. சிறுகதைகளை ஒருநாள் உட்கார்ந்து ரசித்துப் படிக்க வேண்டும். கதைகளுக்கேற்ற வண்ண ஓவியங்கள். இறைமணம் என்ற பெயரில் பக்திமணம்.

” கண்ணாடிகள் “ என்ற தலைப்பினில் நா.முத்துகுமாரின் ஒருபக்கக் கவிதை. அதிலிருந்து சில வரிகள்

”லிப்டில், சலூனில்,

பைக்கில்,நகைக்கடையில் என

எங்கே கண்ணாடி தெரிந்தாலும்

தன்னிச்சையாகத் திரும்பி

தன்னைத்தானே பார்த்துக்கொள்ளாதவர்கள்

யார் இருக்கிறார்கள் உலகில்?

“எத்தனைமுறை பார்த்தாலும்

நீ காட்டும் பிம்பம் மட்டும்

ஏன் சலிப்பதேயில்லை?” என்று

கண்ணாடியிடம் கேட்டேன் “

என்று கேட்கும் கவிஞருக்கு கண்ணாடி சொன்ன பதிலைத் தெரிந்து கொள்ள தி இந்துவின் பொங்கல் மலரில் சென்று பார்க்கவும்.

” என்மனதில் ஓடும் ஆறு” என்ற தலைப்பினில் பிரபஞ்சன் அவர்கள் காவிரியைப் பற்றி சொல்லுகிறார். பாலாறு படும் பாட்டினை வேதனையோடு எழுதுகிறார் அழகிய பெரியவன். இன்னும் வைகை, தாமிரபரணி ஆறுகளைப் பற்றியும் காணலாம்.

சினிமா! சினிமா!

எல்லாவற்றையும் பேசிவிட்டு சினிமாவை அதிலும் தமிழ் சினிமாவைப் பற்றி சோல்லாமல் இருக்கலாமா? எனவே தி இந்துவின் பொங்கல் மலரில் அதுபற்றியும் சுவையான தகவல்கள். ஸ்டுடியோக்களில் செட்டிங்க்ஸில் முடங்கிக் கிடந்த தமிழ் சினிமா மண்வாசனை தேடி கிராமங்களுக்கு வந்த கதையினைச் சொல்லுகிறார் சுபகுணராஜன். ராஜ் கிரணின் கண்டுபிடிப்பு என்றாலும். வடிவேலுவின் முதல் வெற்றி பாரதிராஜாவிடமிருந்தே துவங்குவதாகச் சொல்கிறார் வெ.சந்திரமோகன்.

பொங்கல் படையல்:

முத்தாய்ப்பாக பொங்கல் படையல் என்ற பகுதியிலும் சுவையாகவே சுடச்சுட படைத்துள்ளனர். நமது அனைவருக்கும் தெரிந்த “ஸ்ரீ முனியாண்டி விலாஸ்” பற்றி சுவையாகப் படைத்துள்ளார் ரெங்கையா முருகன். எத்தனை ஆண்டுகள் ஆனாலும் அந்த தனுஷ்கோடி அழிந்த கதையை மறக்க முடியுமா? நினவூட்டுகிறார் – ராமேஸ்வரம் ராக்ஃபி என்பவர். வேடந்தாங்கல் பற்றி அழகிய படங்களுடன் ஒரு மீள் பயணக் கட்டுரை. பயணம் செய்பவர்கள் ஆதி வள்ளியப்பன் மற்றும் போட்டோ கிராபர் கணேஷ் முத்து.

முடிவுரை:

நல்ல சுவையான சூடான பொங்கல் மலரைப் படைத்துள்ளனர் தி இந்து குழுமத்தினர்.அவர்களுக்கு நன்றி!

படங்கள் நன்றி: தி இந்து.

முக்கிய குறிப்பு: இங்கு மேலே உள்ள அனைத்து படங்களும் தி இந்து – பொங்கல் மலர் – 2014 இலிருந்து கேனான் டிஜிட்டல் கேமரா (CANON POWERSHOT A800) வினால் எடுக்கப்பட்டவை.

அனைவருக்கும் எனது உளங்கனிந்த

பொங்கல் நல்வாழ்த்துக்கள்!

 

இலக்கியப் பொங்கல்!

அனைவருக்கும் எனது உளங்கனிந்த பொங்கல்  நல் வாழ்த்துக்கள்! இலக்கியப் பொங்கலாக சில மேற்கோள் வரிகளைக் கீழே  தந்துள்ளேன்!

பொலிவு பொங்கிடும்
பொங்கற் புதுநாளில்
மகிழ்வு பொங்கிடும். நின்
மனையுளார் அனைவர்க்கும்,
என்வாழ்த்து தனை அதற்குத்
தேனாக்கிக் கலப்பதற்கு
வழங்கி மகிழ்கின்றேன்.
வாழியநீ என்றென்றும்,
வாழ்வும் வளமும் மங்காத
தமிழ் என்பார்!
தமிழ்வாழ நாம் வாழ்வோம்.
அறிவாய் நன்றாய்!
நாம்வாழ் வில்பெறும் இன்பம்
கரும்பாகிடல் வேண்டும்
நாட்டி னோர்க்கு.
'தை' அதனில் காணும் செல்வம்
தமக்கென்றே கொண்டனரோ
உழவர், மேலோர்!!
தாரணிக்கு நாம்அளிக்கச்
செல்வம் காண்போம்.
நல்லறம் இஃதெனக் கண்ட 'நம்பி'
நான் வாழ்த்துகின்றேன், உன்
வெற்றிக்காக!

-         அறிஞர் அண்ணா (திராவிட நாடு - 1963)

-         நன்றி: http://www.annavinpadaippugal.info

பொங்கலோ பொங்கல்
பொங்கலோ பொங்கல்
என்றுபா டுங்கள்
மன்றிலா டுங்கள்
எங்கள்நா டெங்கள்

அன்புநா டென்று
நன்றுபா டுங்கள்
பொங்கியா டுங்கள்
பொங்கலோ பொங்கல்
பொங்கிற்றுப் பாலே!     

                     - புரட்சிக் கவிஞர் பாரதிதாசன்  (பொங்கல் வாழ்த்துக் குவியல்)

”தமிழ் நாட்டிலே பல சாதிகள் உண்டு; பல சமயங்கள் உண்டு. ஆயினும், ’தமிழர் அனைவருக்கும் பொங்கல் நாள் ஒரு புனித நாள். அந்த நாளில், வீடுதோறும் சுதையின் விளக்கம்; வீதிதோறும் மங்கல முழக்கம்; ‘பொங்கலோ பொங்கல்’ என்பதே எங்கும் பேச்சு.”

       - டாக்டர் ரா.பி.சேதுப்பிள்ளை , தமிழ் இன்பம், பக்கம்  – 52                          

 

பூஞ்சிட்டுக் கன்னங்கள் பொன்மணி தீபத்தில்

பால் பொங்கல் பொங்குது பன்னீரிலே
பொங்கல் பிறந்தாலும் தீபம் எரிந்தாலும்
ஏழைகள் வாழ்வது கண்ணீரிலே - இந்த
ஏழைகள் வாழ்வது கண்ணீரிலே

                                                - கவிஞர் கண்ணதாசன் (படம்: துலாபாரம்)

 

சித்திரைப் பெண்ணே!

எத் திரை போட்டாலும்

சித்திரைப் பெண்ணே! – உன்

முத்திரையை மறைக்க முடியுமா?

இளவேனில் தாலாட்டில்!

இளஞ் சோலைகள் எங்கும்

இயற்கை இன்பம் பொங்கும்!

தேரோடும் வீதிகளில் மக்கள்

ஊர் கூடி தேர் இழுப்பர்!

பதமாய்ப் பருகிட பதநீர்!

இனிப்பும் கரிப்புமாய் இளநீர்!

சுவைத்து மகிழ்ந்திட                         
சுவையான பழங்கள்!                          
பள்ளிக்கு கோடை விடுமுறை

துள்ளிக் குதித்திடும் பிள்ளைகள்!

மக்கள் தீர்ப்பே

மகேசன் தீர்ப்பு!

உன்னை ஒளித்து வைக்க

யாரால் முடியும்!

முகத்திரை போட்டிடும்

அரசியல் இங்கு வேண்டாம்!

அனைவருக்கும் 

எனது உளங் கனிந்த

தமிழ் புத்தாண்டு வாழ்த்துக்கள்!


(படம்: திருமழபாடி சிவன் கோயில்)

பொங்கலோ பொங்கல் !

எட்டுத் தொகையிலும்

பத்துப் பாட்டிலும்

காப்பியங்கள் ஐந்திலும்

இலக்கியப் பொங்கல்!

கம்பனின் கவிதைகளில்

காவியப் பொங்கல்!

கலைஞரின் கடிதங்களில்

தமிழ்ப் பொங்கல்!

கண்ணதாசன் பாடல்களில்

கவிதைப் பொங்கல்!

வாலியின் நாடாக்களில்

வாலிபப் பொங்கல்!

புரட்சி நடிகரின் முகத்தினில்

புன்னகைப் பொங்கல்!

அம்மாவின் அரசியலில்

அதிரடிப் பொங்கல்!

தோழர்களின் கைகளில்

அறிக்கைப் பொங்கல்!

நண்பர்களின் இதயங்களில்

வாழ்த்துப் பொங்கல்!

அனைவருக்கும் சொல்லுகின்றேன்

பொங்கலோ பொங்கல்!

பொங்கலோ பொங்கல்!

என்று உள்ளக் களிப்போடு!

(Photo: thanks to Peter Koellikers (Google)

புத்தாண்டு வாழ்த்துக்கள்!

எத்தனை ஆண்டுகள் வந்தாலும் போனாலும்

அத்தனை மாந்தரும் அகமகிழச் சொல்வது

புத்தாண்டு வாழ்த்தே!

சித்திரையில் பஞ்சாங்கம் படித்தாலும் 

தைதையென்று தரையினில் குதித்தாலும்

முத்திரை பதிப்பது இந்த புத்தாண்டு வாழ்த்தே!

ஆங்கிலப் புத்தாண்டு அவனியிலே

அனைவருக்கும் பொதுவாகிப் போனது!

இண்டர் நெட்டில், ஈமெயிலில், பேஸ் புக்கில்

எழுதும் கடிதத்தில், சிணுங்கும் செல்போனில்,

சிரித்த முகமாய் நேருக்கு நேராய் – அனைவரும்

சொல்வது புத்தாண்டு வாழ்த்தே!

ஆங்கில வார்த்தை என்றாலும் அனைவரையும்

உற்சாகமாக்கும் “ஹேப்பி நியூ இயர் “

சொல்வதில் தவறில்லை!

மரபுக் கவிதை நானறிந்தாலும் -

வார்த்தைகளை மடக்கியும் நீட்டியும்

சொன்னேன்! - இது கவிதை இல்லை!

வசன கவிதைகளால் ஆகிப்போனது காலம்!


(Photo Thanks to Free-Press-Release)