தீபாவளி மலர்கள் – 2014

உயர்நிலைப் பள்ளியில் படிக்கும் போது பள்ளி நூலகம் சென்றால் அந்த வருட தீபாவளி மலர்களை கண்ணில் காட்ட மாட்டார்கள். பள்ளி அலுவலக ஊழியர்கள் அல்லது ஆசிரியர்கள் எடுத்து போய் இருப்பார்கள். எனவே இரண்டு அல்லது மூன்று ஆண்டுகளுக்கு முந்திய கல்கி, அமுதசுரபி தீபாவ்ளி மலர்களையே நூலகர் தருவார். அதிலும் அடிக்கடி கேட்டுக் கொண்டே இருக்க வேண்டும். வீட்டிற்கெல்லாம் எடுத்துச் செல்ல முடியாது. பள்ளி நூலகத்திலேயே பார்த்து விட்டு கொடுத்து விட வேண்டும். அப்புறம் கல்லூரி மாணவனாக இருந்த போது ஒன்றிரண்டு தீபாவளி மலர்களை பழைய புத்தகக் கடைகளில் பேரம் பேசி மலிவாக வாங்கிப் படித்ததுதான். ஆனால் இப்போதோ வேலையிலிருந்து ஓய்வு பெற்றவுடன் நிறைய தீபாவளி மலர்கள் வீட்டிற்கு வந்துவிட்டன. ஆனாலும் அப்போது படித்த, அந்த நாளைய தீபாவளி மலர்கள் போன்று இல்லை என்பது ஒரு குறை. ஒருவேளை இது வயது ஆக ஆக மனதில் ஏற்படும் சலிப்பாகவும் இருக்கலாம்.

 

கல்கி:

அன்று முதல் இன்று வரை கல்கி தனது பழமை குன்றாத தீபாவளி மலரை வெளியிட்டு வருகிறது. இந்த ஆண்டு சிறுவர்களுக்கென்று “கோகுலம் பக்கங்கள்” மற்றும் மகளிர்களுக்காக “ மங்கையர்மலர் பக்கங்கள் “ இணைத்துள்ளனர். (கல்கி வெளியிட்ட அத்தனை தீபாவளி மலர்களையும் ஒன்று விடாமல் யாரேனும் வைத்து இருக்கிறார்களா? என்று தெரியவில்லை)

ஆனந்த விகடன்:

இந்த ஆண்டு விகடன் தீபாவளி மலர் சற்று முன்னதாகவே வந்து விட்டது. வழ்க்கம் போல பழமையும் புதுமையும் கலந்து வந்துள்ளது. முன்பெல்லாம் தீபாவளி மலர் அட்டைப்படமாக பிரபல ஓவியர்களின் நகைச்சுவைப் படங்கள் இருக்கும். இப்போது சில வருடங்களாக சினிமா நட்சத்திரங்கள்தான்.

அட்டையிலும் உள்ளேயும் நடிகர் சிவகார்த்திகேயன் ஜொலிக்கிறார். இன்னொரு பக்கம், மறைந்த டைரக்டர் ஸ்ரீதர் அவர்களது “காதலிக்க நேரமில்லை” படம் பற்றிய சுவையான நினைவுகள். “ ஆண்களின் நலனுக்காக உருவாக்கப் பட்டதே குடும்பம்” என்கிறார் எழுத்தாளர் சு. தமிழ்ச் செல்வி. இன்னும் கம்போடியாவில் பல்லவ மன்னர்கள் எடுத்த சிலைகள், தஞ்சை சரஸ்வதி மகால் என்று காணலாம்.

தி இந்து :

தமிழில் இந்து வெளிவரத் தொடங்கியவுடன் வெளியிட்ட முதல் தீபாவளி மலரை, சென்ற ஆண்டு வாங்க இயலாமல் போய்விட்டது. இந்த ஆண்டு வந்த இரண்டாவது ஆண்டு தீபாவளி மலர் இது.. புதுமையாக பிரபலமானவர்கள் பற்றி ஒரு பக்கக் கட்டுரைகள் வெளியிட்டு இருக்கிறார்கள். கோட்டோவியப் படங்களுடன். ஓவியர் மனோகர் தேவதாஸின் ” மதுரை நினைவுகள்” பார்த்தேன். ஓவியர் சில்பி நினைவுக்கு வந்தார்.

சக்தி:

தெய்வீகக் கட்டுரைகள், கதைகள் இவற்றிற்காகவே இதனை வாங்குவது வழக்கம். இடையில் சில ஆண்டுகள் வாங்க இயலவில்லை. அண்மையில் மறைந்த தொழிலதிபர் நா.மகாலிங்கம் அவர்கள் இதன் ஆசிரியர். இவர் கொடுத்த ஆதரவில் சக்தி தீபாவளி மலர்கள் சிறப்பாக அமைந்து இருந்தன.

விருப்ப ஓய்வு பெற்றவுடன் ஏதேனும் ஒரு புத்தகம் மட்டும் வாங்குவேன். இந்த ஆண்டு பேப்பர் போடும் தம்பிக்காக (பேப்பர் பையன்?) அதிகப் படியாக தீபாவளி மலர்களை வாங்கி விட்டேன் போலிருக்கிறது. பதிவில் எழுதுவதற்காக ஒரு பார்வை பார்த்தாகி விட்டது. எல்லா மலர்களிலும் வழக்கம்போல வண்ண ஓவியங்கள், சிறு கதைகள், பேட்டிகள் என்று போகின்றன. கவிதைகள் என்றாலே பொங்கல் மலருக்குத்தான் என்று முடிவு செய்து விட்டார்கள் போலிருக்கிறது. வாங்கிய அனைத்து தீபாவளி மலர்களையும் முழுமையாக இனிமேல்தான் நேரம் கிடைக்கும் போது படிக்க வேண்டும்!            

  அனைவருக்கும் எனது உளங்கனிந்த தீபாவளி நல் வாழ்த்துக்கள்!