கையெழுத்து போடுதல்

எனது முதல் கையெழுத்தை எப்போது போட்டேன் என்று எனக்கு ஞாபகம் இல்லை. ஆனாலும் அந்த கையெழுத்தை நான் படித்த உயர்நிலைப் பள்ளியில்தான் போட்டு இருப்பேன் என்று நம்புகிறேன். காரணம், அன்றைய பள்ளி பாடத்திட்டத்தின்படி கடிதம் எழுதுவது எப்படி என்று மாணவர்களுக்கான பயிற்சி தரப்பட்டது, உயர்நிலைப் பள்ளீயில்தான். பெரும்பாலும் விடுமுறைக்கடிதம், நகராட்சி ஆணையருக்கு, போஸ்ட் மாஸ்டருக்கு என்று இருக்கும். ஆரம்பத்தில் புரிந்து கொள்வதற்காக, கையெழுத்து என்றால் உங்கள் பெயரை எழுதுங்கள் என்றே சொல்லி கொடுத்தார்கள். அதற்கப்புறம் இன்றுவரை எத்தனையோ போட்டாகி விட்டது.

வேலைக்கு சேர்ந்தவுடன்:

வேலையில் சேரும்வரை தமிழில்தான் கையெழுத்து போட்டுக் கொண்டு இருந்தேன். வங்கிப் பணியில் சேர்ந்த பிறகு இன்றுவரை ஆங்கிலத்தில்தான். எழுத்தராகவும் (CLERK) காசாளராகவும் (CASHIER) மாறி மாறி பணிசெய்தபோது , அரசு சலான்களில் அதிகமாக அடிக்கடி கையெழுத்திட்டு கையெழுத்தே மாறிவிட்டது. எனது பழைய கையெழுத்து இன்றில்லை.

வங்கிக் கணக்கு:

ஒருவர் வங்கிக் கணக்கைத் தொடங்கும்போது ஆரம்பத்தில் எப்படி கையெழுத்து போட்டாரோ அப்படியே கடைசிவரை போடவேண்டும். சிலர் ஆரம்பிக்கும் போது தமிழில் போட்டுவிட்டு இடையிடையே ஆங்கிலத்தில் போடுவார்கள். இதற்காகவே பழைய பேரேடுகளில் (LEDGER) Sign in என்று இருக்கும்  (தமிழ்/ஆங்கிலம் என்று குறிக்க வேண்டும்) ஒருவர் போட்ட கையெழுத்து சரியாக இருக்கிறதா அல்லது போலி கையெழுத்தா என்பதனை அறிய, கையெழுத்து உள்ள ஆவணத்தையும் (செக், கடிதம் போன்றவற்றை) வங்கியில் பெறப்பட்ட மாதிரி கையெழுத்து பதிவேட்டையும் தலைகீழாக வைத்து ஒப்பீடு செய்து கொள்வோம். (இப்போது எல்லாமே கம்ப்யூட்டர் மயம்; கையெழுத்தை கூட ஸ்கேன் செய்து விடுகிறார்கள். உடனுக்குடன் கம்ப்யூட்டர் திரையில் தலைகீழாகவும் பார்த்து ஒப்பீடு செய்து கொள்ளலாம்)

ஜாமீன் மற்றும் சாட்சி கையெழுத்து:

இந்த காலத்தில் மற்றவர்களுக்காக போடும் ஜாமீன் கையெழுத்திலும், சாட்சி கையெழுத்திலும் மிகவும் ஜாக்கிரதையாக இருக்க வேண்டும். ஏனெனில் காலம் அப்படி இருக்கிறது. ஜாமீன் கையெழுத்து போட்டு, தான் கஷ்டப்பட்ட அனுபவத்தை “வாங்கிய கடனுக்கு அழலாம்; வாங்காத கடனுக்குமா அழ வேண்டும்” என்று தனது ‘அர்த்தமுள்ள இந்துமதம்’ என்ற நூலில் (பக்கம் 372) கவிஞர் கண்ணதாசன் ரொம்பவும் நொந்து போய் சொல்லுகிறார்.

அரசியல்வாதிகள்:

அரசியல்வாதிகள் என்றாலே அவர்கள் தனிரகம்தான். பதவிக்காக நடத்தப்படும் கையெழுத்து வேட்டைகளை நாம் அடிக்கடி ஊடகங்கள் மூலம் தெரிந்து கொள்ளலாம். சில ஆண்டுகளுக்கு முன்பு. இலங்கைத் தமிழர் பிரச்சினைக்காக தி.மு.க சார்பில் ஒருகோடி கையெழுத்து வாங்கி அனுப்பினார்கள். பைண்டு செய்யப்பட்டு அனுப்பப்பட்ட அந்த வால்யூம்கள் என்ன ஆயின? இப்போது மதுவிலக்கிற்காக அதே போல ஒருகோடி கையெழுத்து மக்களிடம் வாங்கப் போவதாக ஒரு கட்சியில்  தெரிவித்துள்ளனர். இப்படியாக இப்போது ஆங்காங்கே நிறைய கையெழுத்து இயக்கங்கள்.

இப்போதெல்லாம் தமிழக அரசியல்வாதிகள் பதவி ஏற்றவுடன் முதல்நாள் முதல் கையெழுத்து எதற்காக இருக்க வேண்டும் என்று, கனவு காண ஆரம்பித்து விட்டார்கள். இதற்காகவே ஒரு அப்பா தனது மகனுக்கு ஒரு பேனா வாங்கி வைத்து இருக்கிறார் என்கிறார்கள். பார்ப்போம்.

                                        COURTESY: www.coolthings.com/knight-pen-holder/